Isang tahimik na ina at mapagmahal na asawa ang nabuhay sa pagitan ng tiwala at lihim na kasalanan. Sa likod ng simpleng pamumuhay ni Emma sa Sumatra, Indonesia, unti-unting nabuo ang isang bawal na ugnayan na nauwi sa trahedyang yumanig sa buong komunidad.

Si Frenny Astriani, mas kilala bilang Emma, ay lumaki sa isang simpleng pamilya sa probinsya ng Sumatra. Bata pa lamang siya ay batid na niya ang hirap ng buhay. Ang kanyang mga magulang ay nagbubungkal ng lupa upang may maipakain sa pamilya, at kahit kapos, sama-sama silang kumakain sa maliit nilang bahay. Dito nahubog ang pagiging masipag, matiisin, at mapagmahal ni Emma.

Sa murang edad, pinili ni Emma na magtrabaho upang makatulong sa pamilya. Naging waitress siya sa isang maliit na bar, kung saan niya nakilala ang lalaking magiging asawa niya kalaunan, si Henry Ratno. Mula sa simpleng pagkakakilala, nauwi ang kanilang ugnayan sa pagbuo ng pamilya. Nabiyayaan sila ng dalawang anak, isang babae at isang lalaki, at pinangarap nilang mabigyan ang mga ito ng mas magandang kinabukasan.

Ngunit habang lumalaki ang mga bata, kasabay namang lumalaki ang pangangailangan ng pamilya. Tumaas ang presyo ng mga bilihin at dumating ang panahon na kailangan na ring pumasok sa paaralan ang kanilang mga anak. Dahil dito, napilitan si Henry na magtrabaho sa Malaysia bilang truck driver upang mas mapalaki ang kita ng pamilya.

Habang nasa ibang bansa si Henry, lumipat si Emma at ang kanilang mga anak sa bahay ng kanyang mga magulang. Dito siya nagsimulang magnegosyo, nagbukas ng maliit na puwesto ng bakso at nagbebenta rin online sa pamamagitan ng social media. Sa panlabas, maayos ang takbo ng kanilang buhay. Palaging nag-uusap sina Emma at Henry sa pamamagitan ng video call, at halos lahat ng kinikita ni Henry ay ipinapadala niya sa pamilya.

Makalipas ang ilang taon, nakapagpatayo rin sila ng sariling bahay, katabi ng tahanan ng mga magulang ni Emma. Sa panahong ito, bumalik si Henry sa Indonesia para sa bakasyon. Dito niya naging mas malapit ang kapitbahay na si Mushi Hudin, kilala bilang Dino, isang may asawa at ama rin ng mga anak.

Naging magkumare sina Henry at Dino. Madalas silang mag-inuman habang naglalaro ang kanilang mga anak. Si Emma naman ang naghahanda ng pagkain at inumin. Sa tiwala ni Henry, iniwan niya kay Dino ang responsibilidad na tumulong kay Emma at sa mga bata kapag siya ay muling bumalik sa Malaysia.

Pag-alis ni Henry, dito unti-unting nagbago ang takbo ng mga pangyayari. Ayon sa pag-amin ni Dino sa mga awtoridad, naging madalas ang kanyang pagpunta sa bahay ni Emma upang tumulong sa mga gawain, sa pag-aayos ng bahay, at sa paghahatid-sundo sa mga bata. Sa paglipas ng panahon, nauwi umano ang kanilang pagiging malapit sa isang bawal na relasyon.

Sa gabi ng December 16, nagkaroon ng matinding pagtatalo sina Emma at Dino dahil sa usaping pera. Ayon sa salaysay, humingi ng pera si Dino ngunit tumanggi si Emma at sinabihan pa siyang humingi sa sariling asawa. Nauwi ito sa palitan ng masasakit na salita na nagpaalab sa galit ng lalaki.

Sa gitna ng matinding emosyon, kinuha umano ni Dino ang isang matigas na kahoy na nagsisilbing kandado sa likod ng pinto at paulit-ulit na ipinampalo kay Emma. Matapos ang insidente, itinapon ang kahoy sa isang balon at tumakas ang suspek palabas ng probinsya.

Madaling-araw ng December 19, nagising ang ama ni Emma sa malakas na sigaw ng kanyang anak. Nang kanyang puntahan ang labas ng bahay, natagpuan niya si Emma na duguan at wala nang malay. Agad siyang dinala sa ospital ngunit idineklara na siyang wala nang buhay.

Nahirapan ang mga pulis sa unang yugto ng imbestigasyon dahil nagalaw na ang crime scene. Lumabas sa autopsy na ang sanhi ng kanyang pagpanaw ay matinding pinsala sa ulo. Nawawala rin ang cellphone ni Emma, na pinaniniwalaang mahalagang ebidensya sa kaso.

Dalawang araw matapos ang insidente, kusang sumuko si Dino sa pulisya. Inamin niya ang buong pangyayari at ang relasyon nila ni Emma. Sa kanyang cellphone, natagpuan ang mga video at mensahe na nagpatunay sa kanilang lihim na ugnayan.

Samantala, nananatiling naguguluhan si Henry. Sa kabila ng mga ebidensya, mahirap para sa kanya na tanggapin ang nangyari. Ayon sa kanya, mahal na mahal pa rin niya si Emma at ang tanging iniisip niya ngayon ay ang kapakanan ng kanilang mga anak.

Sa kasalukuyan, nahaharap si Dino sa kasong m.u.r.d.e.r at patuloy na nakakulong habang hinihintay ang paglilitis. Ang kwento ni Emma ay nagsilbing masakit na paalala kung paano maaaring magbunga ng trahedya ang pagsasamantala sa tiwala, at kung paanong ang isang maling desisyon ay kayang magwasak ng maraming buhay.